पुणे : राष्ट्रवादी काँग्रेसचे अध्यक्ष आणि राज्यातले ज्येष्ठ राजकीय नेते शरद पवार यांच्या राजकीय कारकिर्दीला बुधवारी, २२ फेब्रुवारी रोजी पन्नास वर्षे पूर्ण झाली. २२ फेब्रुवारी १९६७ या दिवशी पवार हे बारामती मतदारसंघातून काँग्रेसच्या वतीने विधानसभेवर निवडून गेले होते. विशेष योगायोग म्हणजे राज्याचे सध्याचे मुख्यमंत्री देवेंद्र फडणवीस यांच्या राजकीय कारकिर्दीची सुरुवातही २२ फेब्रुवारीलाच झाली आहे. २२ फेब्रुवारी १९९२ ला देवेंद्र फडणवीस हे नागपूर महानगरपलिकेत भाजपचे उमेदवार म्हणून निवडून आले होते.
शरद पवार पहिल्यांदा निवडून आले तेव्हा त्यांचे वय २७ वर्षे होते, तर फडणवीस पहिल्यांदा निवडून आले तेव्हा २२ वर्षांचे होते. पवार यांना तरुणपदी मंत्रिपद मिळाले. फडणवीस हे १९९७मध्ये तरुण वयातच नागपूरचे महापौर म्हणून निवडून आले. पवारांना ३८व्या वर्षी राज्याचे मुख्यमंत्रिपद पहिल्यांदा मिळाले. फडणवीस यांना ४४व्या वर्षी मुख्यमंत्रिपदाची संधी मिळाली. पवार यांनी चारदा मुख्यमंत्रिपद, तर केंद्रात संरक्षण, कृषी, अन्न व नागरी पुरवठा या महत्त्वाच्या खात्यांचे मंत्रिपद भूषवले. लोकसभेचे विरोधी पक्षनेते, विधानसभेत विरोधी पक्षनेतेपदही भूषविले. काँग्रेस, समाजवादी काँग्रेस व राष्ट्रवादी काँग्रेस असा त्यांचा आतापर्यंतचा राजकीय प्रवास आहे.
'संसदीय राजकारणात पाच दशकांची यशस्वी कारकीर्द पूर्ण करणारे शरद पवार यांच्या नेतृत्व व कर्तृत्वाबद्दल आपणास अभिमान वाटतो,' अशा शब्दांत सुप्रिया सुळे यांनी टि्वटरवर प्रतिक्रिया व्यक्त केली आहे.
दोन्ही लोकप्रतिनिधींच्या कारकिर्दीस २२ फेब्रुवारीला सुरुवात झाली. अर्थात दोघेही निवडून येण्यातील अंतर हे तब्बल २५ वर्षांचे आहे. एक आमदार म्हणून, तर दुसरे नगरसेवक म्हणून निवडून आले. योगायोग किंवा अन्य काही असो, पण पुढे दोघेही मुख्यमंत्रिपदापर्यंत पोहचले व तेही उभयतांना तरुण वयातच मिळाले.